بینکوں میں آج بزرگوں کے ہی بدلے جا رہے پرانے نوٹ، کتنی مل رہی راحت

نئی دہلی۔ آج ملک بھر کے بینکوں میں نوٹ تبدیل کرنے کا کام نہیں کیا جائے گا۔ تاہم بزرگوں کو اس اصول سے چھوٹ رہے گی۔ عمر رسیدہ افراد کسی بھی بینک میں جا کر بینک نوٹ بدلوا سکیں گے۔ بینک ایسوسی ایشن کا کہنا ہے کہ آٹھ تاریخ سے نوٹ بندی کے بعد سے ہی بینک اپنے گاہکوں کے کام نہیں کر پا رہے ہیں، اس لئے بینک آج صرف اپنے گاہکوں کے بچے ہوئے کام نپٹائیں گے۔ انڈین بینکس ایسوسی ایشن نے کہا ہے کہ تمام بینک آج صرف اپنے گاہکوں کی خدمت کریں گے۔دوسرے بینکوں کے گاہکوں کی ہزار پانچ سو روپے کی کرنسیاں نہیں بدلیں گے۔



ایسو سی ایشن کے سربراہ راجیو رشی نے کہا کہ ابتک ہمارے گاہک اس لئے پریشان رہے کہ ہم ان کا کام نہیں کر پارہے تھے۔ برانچوں میں خاص طور پر ہمارے موجودہ گاہکوں کے کام التوا میں پڑ گئے ہیں اس لئے آج سنیچر کو ہم خاص طور اپنے گاہکوں کی خدمت کریں گے۔ یعنی [باہر کے گاہکوں کے لئے] نوٹ نہیں بدلے جائیں گے۔ انہوں نے کہا کہ بہر حال بزرگ شہریوں کو استثنا حاصل رہے گا۔ وہ کسی بھی برانچ سے کرنسی بدلنے کے لئے رجوع کر سکیں گے۔ ایسا صرف آج کے لئے ہے۔ پیر سے سارے گاہک بینک کے کسی بھی برانچ میں جاکر پرانی کرنسی بدل سکتے ہیں۔